పల్లవి:
తూర్పు దిక్కు చుక్క బుట్టె - మేరమ్మ ఓ మరియమ్మ
చుక్కను చూచి మేము వచ్చినాము - మ్రొక్కిపోవుటకు (2)
1. యెరూషలేము పురము జేర వచ్చినాము - హేరోదు నొద్దకు
ఎక్కడ లేడని అడిగినాము - మనవి చేసినాము ॥తూర్పు॥
2. పండిత శాస్త్రులనెల్ల పిలచినారు - వారు వచ్చినారు
పూర్వ వేదంబులను తెచ్చినారు - తేరి వెదకినారు ॥తూర్పు||
3. బేత్లహేము పురములోని బాలుడమ్మా - గొప్ప బాలుడమ్మా
బీదకన్య గర్భమందు బుట్టెనంచు - వారు నుడివిరమ్మా ॥తూర్పు||
4. పశువుల పాకలోన బాలుడమ్మా పాప రహితుడమ్మా
పాపంబు బాపను బుట్టెనమ్మా - సత్యవంతుడమ్మా ||తూర్పు||
5. బంగారు సాంబ్రాణి బోళం దెచ్చినారు - బాలయేసు నొద్దకు
బంగారు పాదముల మ్రొక్కినారు - బహుగా వేడినారు ॥తూర్పు॥